Rujak Silet

Walah, kapan kae aku kok yo diundang tetemuan nang ngayogyokarto. Lha sing ngundang konco-konco saka departemen pertanian.

Pas ngono kok yo onok ae sing ndhagel. Jarene kancaku mau: "Wah Mas, wingi-wingi pas Pak eSBeYe ngundangi calon-calon menteri, konco-konco nang kantor wis rencana tuku silet, lho"

"Lho gae opo?"
"Silet yo gae nyukur jenggot tah brengos.."
"Lha ngopo to?"
"Yo bek-beke mengko menteri sing kepilih uduk soko PeKaeS...."
"Njut...?"
"Yo konco-konco sing maune klimis yo bakal nyukur jenggote"
"Lha ning?"
"Yo iku, sing dipilih Pak BeYe, pancet soko PeKaeS, ngono lho?"
"Hayaaah... mentan anyar iku uduk PKS, tapekno PKB...."
"Ngawur ae sampiyan.. jelas PKS ngono lho, malah jenggote lebih tebel mbangane Pak Anton..."
"PKB to wis...!"
"PKB mik entuk menteri 2 ngono lho..."
"PKB = PKS Banget..."
"Semprul....!!!"

Yok opo nek wis ngene iki?

Poro sedulur kang rawuh nang GGBS (Gremang-gremeng Grundal Grundel ambek Mbah Soeloyo), gek pemilihan gubernur Jawa Barat biyen aku wis nulis ngenani 'Politik Masuk Kampus (IPB)'. Partai sing dirembug PKS. Lha saiki kok yo ngono maneh yo?

Ono salah sawijine Caleg Sing masang Baligo guedhiiii (gek ragate piro yo?) nang cedhak kampus IPB Darmaga (yaaaa kira-kira 2 km sak durunge kampus lah). Caleg iki ketoke mono yo lulusan IPB saka Kehutanan, wong gelare S.Hut ki. Kok yo partene podho ambek parte sing tak tulis biyen... Pe Ka Es... Lha sing njelehi iku judhule Baligo iku:
SELAMAT DATANG DI BOGOR BARAT
Pesona Pendidikan dan Wisata Religius Kabupaten Bogor....

Njut sing dadi tujuan pertama kok ya:
Kampus Institut Pertanian Bogor....

Weleeeh weleeeeeh.... wis nek diterus-terusake Kampus IPB dijarno ae kanggo tingkah polah poro politikus, sepisan maneh kari tunggu waktu kapan ambruke...:-). Kagem para sivitas akademika, mbok yo sing eling yen saiki lagi kepareng dadi parogo PENDIDIKAN TINGGI. Mbok yo dho rasah melu-melu politik ngono lho. Opo maneh partene parte sing dhasare agama, wis kojur tenan iki. Tangeh lamun bisa netral anggone makaryo wulang-wurug kawignyan lan kaprigelan ngelmuning Tetanen. Eling, Mas, Mbak, Pak, Bu, Dik... IPB iku duweke wong sak negoro... dudu duweke parte-partene sampiyan kabeh. Tur IPB pisan kang wis dadi papan kanggo golek pangan Sampiyan kabeh sak keluarga.....

--Nuwun--

Kampus Kelebon Politik?

Wah, wiisss.... wis, maune aku yo ora percoyo nemen-nemen yen nganti kampus utawa perguruan tinggi (pawiyatan luhur) iku kelebon politikus. Sak ora-orane kelebon tokoh-2 parte, lha wong aturane pegawe negeri sipil kuwi ora kena dadi aktivis parte. Nek nganti kaya mengkono, bakal kisruh mengko urusan pawiyatan ngelmu-ngelmu luhur-e.

Ning bareng aku dikirimi foto loro iki terus wae cumleng pikirku. Nang nggo poster kampanye Ahmad Heryawan lan Dede Yusuf, lha kok latar belakange mahasiswa-mahasiswa IPB kang lagi dilantik? Weh-weh... opo memper lan bener iki? Yen nganti bener-bener kaya mangkene.. wis-wis mik kari nunggu kapan rontok lan ambruke pawiyatan luhur ing IPB iki. Apa bisa dosen-dosen kang tibake aktif nang parte-parte iku bisa NETRAL anggone mulang-muruk marang mahasiswa? Apa bisa mahasiswa-mahasiswa kang sejatine tokoh-tokoh muda parte iki bisa mrantasi tugas-tugas akademik-e?



Coba digalih yen ing DPC PKS Dramaga kang cedhak ambek kampus IPB nganti ana poster kang kaya mangkene? Mbuh nang endi maneh kiblate para sivitas akademika kampus rakyat iki. Kok umyek melu-melu politik. Apa maneh politik-e melu marang parte kang dhasare agomo? Weleh-weleeeh... piye yo?

Njut piye ngono lho, sikep kang dora (boso arabe munafik) nganti dadi sikepe para ngilmuwan lan calon ngilmuwan kaya mangkene iki. Kapan bisane IPB melu moncer nang donyane akademik lan pendidikan tinggi ing Nuswantara? Apa bisa nggayuh IPB kalebu universitas kang kelas dunia, kelas internasional, yen para akademisi-ne wae tumindak lan darbe sikep DORA kaya mangkene?

Ah, aku minangka dosen utun ing IPB, kepengin ah... asung peling marang kanca-kanca. Mbok ayo mikirake moncere kampus IPB... urusan negara ben wae dipikir ambek sing kepengin kuwasa. Ngideri Nuswantara ya ben wae sak karep-karepe. Ning pelingku... mbok yo minangka dosen utawa guru (luwih-luwih guru besar; jaman biyen sebutane mPu utawa Begawan) kuwi bener-bener bisa diguGU lan ditiRU ngono lho....

Dadi manungsa guru kuwi abot... kudu Ber Budi Bawa Leksana.... Ber budi tegese kebak marang nalar lan penemu kang jumbuh karo pendidikan kang wis dilakoni. Bawa Leksana kuwi ibarate kara manggis sigar tekan kendagane... arepa njaba ireng, ning balibare tetep putih.... apa kang diucapake kudu numus marang kelakone... ya bawane ya leksanane...

Nuwun